Սփյուռքի նախարարն ընդունել է Հայաստանում ԱՄԷ դեսպան Ջասիմ Մուհամմադ Ալ Կասիմիին

21-06-2017 16:38

Հ սփյուռքի նախարար Հրանուշ Հակոբյանը հունիսի 21-ին ընդունեց ՀՀ-ում Արաբական Միացյալ Էմիրությունների Արտակարգ և լիազոր դեսպան Ջասիմ Մուհամմադ Ալ Կասիմիին: Այս մասին տեղեկացրին ՀՀ սփյուռքի նախարարության մամուլի և հասարակայնության հետ կապերի վարչությունից: Ողջունելով դեսպանին ՝ նախարարը ներկայացրեց գերատեսչության պետական քաղաքականությունը և այդ քաղաքականության իրականացմանը նպաստող ծրագրերը, ինչպես նաև, նախարարության առաջնային խնդիրներն ու անելիքները: ԱՄԷ դեսպանը շնորհակալություն հայտնեց ջերմ ընդունելության ու հանգամանալից զրույցի համար, և նշեց, որ Արաբական Միացյալ Էմիրություններում հետաքրքրված են Հայաստանով և փնտրում են հնարավորություններ հայ-էմիրաթական բարեկամական կապերն էլ ավելի սերտացնելու համար, նշեց, որ հայերը շատ մեծ ներդրում ունեն երկրի գործարարության, մշակույթի և կրթության բնագավառում: Պարոն դեսպանը շեշտեց, որ նախատեսվում է ԱՄԷ փոխէմիրի այցելությունը Հայաստան: ՀՀ սփյուռքի նախարար Հրանուշ Հակոբյանը նշեց, որ բարեկամությունը ավելի է ամրապնդվում, երբ բարեկամները մոտիկից են ծանոթանում, ճանաչելի են դառնում: Նա հորդորեց ավելացնել տարբեր մակարդակների փոխայցելությունները, զարգացնել զբոսաշրջությունը, համատեղ կոնֆերանսներ, քննարկումներ, ցուցահանդեսներ, համերգներ կազմակերպել: Առաջարկները ոգևորությամբ ընդունվեցին: Քննարկվեցին նաև հետագա համագործակցության այլ հարցեր:

1in.am
21-06-2017 16:38