Պետք է քրեական գործ հարուցվեր, պարոն Ծառուկյանը պիտի հարցաքննվեր

Մեր զրուցակիցն է «Քաղաքացու որոշում» սոցիալ-դեմոկրատական կուսակցության անդամ Գարեգին Միսկարյանը Պարոն Միսկարյան, ՀՔԾ-ն մերժել է ԲՀԿ նախագահ Գագիկ Ծառուկյանին մանդատից զրկելու գործով քրեական գործ հարուցելու դիմումը հանցակազմի բացակայության պատճառով: Փաստացի նշվում է, որ թղթերով ամեն ինչ կարգին է: Այս դեպքում ի՞նչ եք անելու: Անկեղծ ասած, անձամբ ես մեծ հույսեր չունեի, թե ՀՔԾ-ն գործ կհարուցի, չնայած, որ իր հրապարակային խոսքի մեջ Գագիկ Ծառուկյանը բազմիցս կատարել է հայտարարություններ, որոնք ողջամիտ կասկածներ են առաջացնում առ այն, որ նա անմիջականորեն միջամտում է իրեն պատկանող բիզնեսների կառավարմանը, այն է` զբաղվում է ձեռնարկատիրական գործունեությամբ: Պաշտոնական պատասխան ՀՔԾ-ից դեռևս չենք ստացել, բայց եթե հիմք ընդունենք մամուլում տարածված տեղեկությունը, ըստ որի՝ գործ չի հարուցվել հանցակազմի բացակայության պատճառով, ապա ստացվում է, որ Գագիկ Ծառուկյանի հայտարարությունները ՀՔԾ-ում նույնիսկ կասկած չեն առաջացրել նրա ձեռնարկատիրական գործունեության վերաբերյալ: Դա աբսուրդ է, որը կարող է նշանակել, որ կամ ՀՔԾ-ում նստած են գործից չհասկացող մարդիկ, կամ կայացվել է քաղաքական որոշում: Ես այլ բացատրություն չեմ տեսնում: Իմ կարծիքով, եղած փաստերը հաշվի առնելով, դիմումի հիման վրա, միանշանակ, պիտի քրեական գործ հարուցվեր, պարոն Ծառուկյանը պիտի հարցաքննվեր, բացատրություն պիտի տար իր կատարած հայտարարությունների վերաբերյալ: Հետո գուցե կարճվեր գործը, դա այլ հարց է: Այն, որ ՀՔԾ-ն պնդում է, որ կասկածներ չկան Ծառուկյանի ձեռնարկատիրական գործունեության հետ կապված, ուղղակի ծիծաղելի է: Այս գործի հետ կապված, հետագա քայլերի վերաբերյալ կուսակցությունը դեռևս վերջնական որոշում չի կայացրել, բայց կարծում եմ, որ հաջորդ քայլը կարող է լինել ԱԺ քսանյոթ պատգամավորների ստորագրությամբ Սահմանադրական դատարան դիմելը, որպեսզի այն մեկնաբանի Սահմանադրության 95-րդ հոդվածը, որտեղ հստակ գրված է, որ պատգամավորը չի կարող զբաղվել ձեռնարկատիրական գործունեությամբ: ՔՈ կուսակցությունը բարձրացրեց բիզնեսի և քաղաքականության անհամատեղելիությունը, Իմ քայլի որոշ պատգամավորներ ձեր ներկայացրած տեսանյութի մեջ խնդիր տեսան: Այս դեպքում որքանո՞վ է նպատակահարմար էթիկայի հանձնաժողովի ձևավորումը: Բիզնեսի և քաղաքականության տարանջատումը, ի սկզբանե, եղել է հեղափոխության օրակարգային կետերից մեկը: Եթե հիշում եք, Արարատ Միրզոյանը դրա մասին անձամբ հայտարարեց հարթակից: Պիտի նշեմ նաև, որ այն եղել է հեղափոխությանը մեր մասնակցության պայմաններից մեկը: Այս կոնտեքստում, այդ հանձնաժողովը ձևավորելու անհրաժեշոտությունը պիտի ոչ թե մեր կողմից առաջ քաշվեր, այլ առաջինը հենց ԱԺ-ում գտնվող քաղաքական ուժերի կողմից: Ավելին, եթե պարոն Ծառուկյանը վստահ է, որ իր մոտ ամեն ինչ կարգին է, ապա, գնահատելով խնդրի կարևորությունը, կարող էր այդ հարցը բարձրացնել հենց ԲՀԿ խմբակցությունը: Բայց, ինչպես տեսնում ենք, էթիկայի հանձնաժողովի ձևավորումը շատ մեծ հարցականի տակ է, եթե չասենք` մերժված: Ինչ վերաբերում է տեսանյութին, ապա պիտի ասեմ, որ ինտերնետը ողողված է պարոն Ծառուկյանի նմանատիպ հայտարարությունների տեսանյութերով: Հանձնաժողով ստեղծելու համար հանգիստ կարելի էր գտնել դրանցից այնպիսիները, որոնք «կգոհացնեին» հանձնաժողով ստեղծելու ցանկություն ունեցողներին: Կարելի՞ է արդյոք սրանից հետևություն անել, որ իշխանությունները քաղաքական որոշում ունեն չպատժել գործարար պատգամավորին: Որքանո՞վ իշխանությունը ունի Ծառուկյանի կարիքը որպես քաղաքական միավոր: Խնդիրը պատժել-չպատժելու մեջ չէ: Խնդիրը պարոն Ծառուկյանի մեջ չէ: Խնդիրը արժեքների և դրանց հավատարիմ լինելու մեջ է: Մեծ հաշվով, մենք ի՞նչ ենք ուզում, ինչպիսի՞ Հայաստան ենք ուզում ունենալ, ի՞նչ քայլեր են անհրաժեշտ դրանց հասնելու համար: Ես խորապես համոզված եմ, որ արդար, իրավական երկիր ստեղծելու համար, հատկապես մեր նման սուղ ռեսուրսներով և փոքր պետության համար, անհրաժեշտ է տարանջատել բիզնեսը և քաղաքականությունը: Հակառակ դեպքում հաջորդ Ազգային ժողովում մենք կարող ենք ունենալ տասը Գագիկ Ծառուկյան, որոնք միավորվելով դարձյալ ձեռք կգցեն պետական կառավարման ապարատը, և մենք դարձյալ կունենանք այն, ինչից հրաժարվում էինք, ինչը մերժում էինք: Անդրադառնալով հարցի երկրորդ մասին. կարծում եմ, որ այս պահին ավելի շատ Գագիկ Ծառուկյանը ունի «Իմ քայլի» կարիքը, քան թե հակառակը: Ու դա երկու դեպքում էլ՝ և եթե նա մնա Ազգային ժողովում, և եթե որոշի վայր դնել մանդատը: Բայց թե ինչո՞ւ «Իմ քայլը» չի գնում հեղափոխական արժեքների հաստատման ճանապարհով, դժվարանում եմ ասել: Անցումային արդարադատության շուրջ քննարկումները կմեկնարկեն մայիսի 24-ին: Հնարավո՞ր է արդյոք անցումային արդարադատությունը լուծի նաև այս խնդիրը: Առհասարակ, եթե ամենասկզբում իրականացվեր, այս խնդիրները կծագեի՞ն: Այս խնդիրը ավելի շատ Սահմանադրության, Կուսակցությունների մասին օրենքի և Ընտրական օրենսգրքի կարգավորման հարթության մեջ է: Անցումային արդարադատությունը չի կարող լուծել կապիտալի և քաղաքականության տարանջատման հարցը: Այն պիտի օրենսդրական կարգավորումների դաշտում լինի: Մյուս կողմից էլ, այո, գուցե Անցումային արդարադատության իրականացման դեպքում որոշ մարդկանց մոտ վերանար ԱԺ-ում, կամ Կառավարության մեջ հայտնվելու բուռն ցանկությունը, բայց մենք դա արդեն չենք կարող իմանալ: Անցումային արդարադատության իրականացումը, ինքնին, բարդ և տևական ժամանակ պահանջող պրոցես է, այն ուղղակի հնարավոր չէր այս կարճ ժամանակահատվածում իրականացնել: Որքան էլ որ մենք շատ ցանկանանք:

ՍԻՐԱՆՈՒՅՇ ՊԱՊՅԱՆ, Հարցազրուցավար
15-05-2019 23:39