Եթե սահմանադրական կարգի տապալման ինչ-որ փորձեր կան, պետությունը չպե՞տք է կանխի

Մեր զրուցակիցն է Արցախի Հանրապետության նախագահի մամուլի խոսնակ Դավիթ Բաբայանը Պարոն Բաբայան, Արցախի ԱԱԾ-ն հանդես է եկել հայտարարությամբ և նշել, որ Սահմանադրական կարգը խաթարելուն ուղղված բոլոր ոտնձգությունները կարժանանան համարժեք իրավական գնահատականի: Ձեր կարծիքով, ի՞նչ է սա նշանակում, դուք ներքին վտանգ տեսնո՞ւմ եք առաջիկա նախագահական ընտրություններով պայմանավորված: ԱԱԾ հայտարարությունը որևէ մեկին կոնկրետ միտված չէ: Սա ընդհանուր հայտարարություն է, որ բոլորը պետք է իրենց գործունեությունն իրականացնեն օրենքի շրջանակներում՝ հաշվի առնելով բազմաթիվ յուրահատկություններ՝ պատերազմական գոտի լինելը և այլն: Եթե հիմա քաղաքական գործիչներն ու կուսակցություններն իրենց գործունեությունը ծավալեն ըստ օրենքի, ինչո՞ւ պետք է որևէ մեկը մտահոգվի: Բայց նախկինում երբևէ նման հայտարարություն չէր եղել: Դուք նախընտրական լարվածություն տեսնո՞ւմ եք, որ անհրաժեշտություն առաջացավ նման հայտարարությամբ հանդես գալ: Այս պահի դրությամբ որևէ լարվածություն չկա: Սա ընդհանուր հայտարարություն է, իմ կարծիքով, չնայած ավելի լավ կլինի իրենցից ճշտեք: Ես որպես քաղաքական ուժի ներկայացուցիչ կարող եմ ասել, որ, ըստ երևույթին, սա բոլորին է վերաբերում: Մենք պետք է ամեն ինչ անենք, որպեսզի բոլոր այդ ընտրական գործընթացները, զարգացումները լինեն խստիվ օրենքի սահմաններում, որևէ ձևով չխախտեն օրենքը, կայունությունը և այլն: Այո, ակտիվ շրջան է, այո, մրցակիցներ են մեկը մյուսին, բայց հո թշնամիներ չե՞նք: Ինչպե՞ս եք գնահատում Սամվել Բաբայանի աջակիցների ստորագրահավաքը: Արցախում Սամվել Բաբայանից վտանգ կա՞: Արցախում իրավիճակը հանգիստ է ու կայուն: Թե ինչ կլինի հետագայում, ես չեմ կարող ասել, առավելևս այլ մարդկանց անունից: Ինչ վերաբերում է ստորագրահավաքին, յուրաքանչյուր գործընթաց, որ ընթանում է օրենքի սահմաններում, միմիայն ուժեղացնում է երկիրը: Բոլոր գործընթացները, որոնք խախտում են օրենքը, թուլացնում են երկիրը: Սա միանշանակ է: ԱԺ-ում այսօր տեղի ունեցավ Ապրիլյան պատերազմի հանգամանքները քննող հանձնաժողովի նիստը: Հանձնաժողովի նախագահ Անդրանիկ Քոչարյանը նշել է, որ Արցախից նույնպես կհրավիրվեն պաշտոնյաներ, որոնք այդ շրջանում պաշտոն են ունեցել, այդ թվում բարձրաստիճան զինվորականներ: Ինչպե՞ս եք գնահատում այդ գործընթացը, և ձեր կարծիքով ովքե՞ր պետք է գան ու հանձնաժողովում ասելիք ունենան: Նախ պետք է տեսնել, թե հանձնաժողովն ում է ուզում այնտեղ տեսնել և ինչ հարցերով: Առհասարակ, երբ այդ հանձնաժողովը ստեղծվում էր, մենք հայտարարել ենք, որ կարևոր է, որ և Արցախից լինեն, և տարբեր շրջանակներից, որպեսզի ավելի օբյեկտիվ տեղեկատվություն ունենանք այդ գործընթացների վերաբերյալ: Հետևաբար, պետք է տեսնենք, թե ում են ուզում հանձնաժողովի անդամները տեսնել, լսել: Չեմ կարծում, որ այստեղ կարող է որևէ խնդիր լինել: Շատերը չեն բացառում, որ այս հանձնաժողով կհրավիրվի նաև Սերժ Սարգսյանը: Հնարավո՞ր է Բակո Սահակյանին նույնպես հրավիրեն: Եկեք սպասենք, ես ի՞նչ իմանամ, թե ոնց է լինելու, հանձնաժողովն ում է ցանկանալու լսել: Պարզ է, որ սա դատարան չէ, պարզապես մի տեղ է, որտեղ պատգամավորներն ուզում են ավելի ճիշտ պատկերացում ստանալ, թե ինչ է տեղի ունեցել: Իրենք հո հանդես չե՞ն գալիս դատավորի կեցվածքով: Սա պարզապես հանձնաժողով է, որն այս կամ այն խնդրի շուրջ ուզում է ավելի խորը պատկերացում ստանալ: Դուք կարծում եք, որ կա՞ դրա անհրաժեշտությունը՝ հաշվի առնելով, որ այդ պատերազմի հանգամանքները մինչև վերջ բացահայտված չեն: Նայած ինչ հանգամանքներ: Լավ է, որ ավելի խորը, անաչառ պատկերացում կարող ենք ստանալ այս կամ այն երևույթի մասին, առանց որևէ հետին մտքի: Եթե այդպես է, ես որևէ վատ բան չեմ տեսնում: Արցախի ԱԱԾ տարածած հայտարարությունում նշվում է, որ սահմանադրական կարգը խաթարելուն ուղղված բոլոր ոտնձգությունները կարժանանան համարժեք իրավական գնահատականի, կձեռնարկվեն համապատասխան միջոցներ դրանք կանխելու համար: Սահմանադրական կարգի տապալման փորձի հնարավորություն տեսնո՞ւմ եք քաղաքական այն ուժերի կողմից, որոնք ուզում են ընտրություններից առաջ քաղաքական հայտ ներկայացնել: Դա ցույց կտա ժամանակը: Եթե ամեն ինչ ընթանա օրենքի շրջանակներում, ի՞նչ սահմանադրական կարգի տապալում կարող է լինել: Իսկ եթե սահմանադրական կարգի տապալման ինչ-որ փորձեր կան, ո՞նց եք կարծում, չպե՞տք է այդ ամենը պետությունը կանխի: Սա է հարցը:

ՍԻՐԱՆՈՒՅՇ ՊԱՊՅԱՆ, Հարցազրուցավար
09-07-2019 21:21