Այնտեղ «Լամբորջինի»-ներով պտտվող երիտասարդներ կային. դրանք կազմակերպված բանդաներ են

Մեր զրուցակիցն է «Իմ քայլը» խմբակցության պտգամավոր Հայկ Գևորգյանը Բագրատաշենի անցակետում մեծ հերթեր են: ՊԵԿ նախագահն ասում է, որ ընդամենը 4 կետ է սպասարկում քաղաքացիներին: Չէ՞ր կարելի ավելացնել կետերի թիվը, քանի որ սպասելի էր, որ մեքենաների ներկրումը կտրուկ աճելու է: Այդ ամենը մեխանիկորեն մեկ գրչի հարվածով լուծել չես կարող, այն համալիր լուծում է պահանջում: Մեքենաների ներկրումը շատ մեծ հարցի մի փոքր հատված է: Հիմա ծրագիրն իրականացվում է, մաքսատունը կտեղափոխվի Գյումրի, կլինի մասնագիտացված, բոլոր ծառայությունները մատուցող մաքսատուն և հարակից կառույցներ, այսինքն նաև Ճանապարհային ոստիկանություն, որը մաքսազերծումից հետո կգրանցի մեքենաները, տեխնիկական զննություն և այլն: Բոլոր ծառայությունները կենտրոնացված կլինեն մի տեղ, մարդը կիմանա, որ մաքսազերծելու համար պետք է մտնի Գյումրի: Իսկ օրինակ բեռների մաքսազերծումը կարող է լինել այլ քաղաքում: Բայց խնդիրը միայն դա չի, մենք նաև օրենսդրության հետ ունենք խնդիրներ, որը պետք է համահունչ լինի ԵԱՏՄ-ին: Օրինակ, մեզ մոտ պիտի պարտադիր բրոքերի ինստիտուտը լինի: Մեծ փոփոխություններ կլինեն ոլորտում, և ես վստահ եմ, որ մոտ ապագայում, իրոք, Հայաստանում մաքսազերծումը կտևի րոպեներ կամ կես ժամ: Գյումրիում մաքսատունը որքա՞ն ժամանակում կկառուցվի: Եթե դա կտևի 2 տարի, պետք չէ՞ր կարճաժամկետ լուծումներ տալ մինչև մաքսատունը Գյումրի տեղափոխելը: Ես չեմ կարող ասել, թե որքան կտևի, որովհետև դա տեխնիկական հարց է: Իհարկե, պետք է կարճաժամկետ լուծումներ տալ: Օրինակ, եթե մենք մաքսայինի ֆինանսավորումը մեծացնենք, որպեսզի աշխատողների թիվը կտրուկ մեծանա, հետո շենքային պայմաններ ապահովենք, որ իրենք նստելու տեղ ունենան, դե հիմա հաշվեք, թե դա որքան կկազմի: Այսինքն ամեն բան այդքան հեշտ չի, հավատացեք: Իջևանում տեղի ունեցածի հետ կապված ընդդիմության ներկայացուցիչները, մասնավորապես, ԲՀԿ-ականները, հայտարարում են, որ անտառի հատումն արգելելուց առաջ իշխանությունները պետք է այլընտրանք առաջարկեն: Ի՞նչ է անում իշխանությունն այդ ուղղությամբ: Իսկ իշխանությունն ի՞նչ է առաջարկում Շիրակի բնակչությանը, Աշտարակի բնակչությանը: Քանի կա ծառահատումների ինստիտուտը որպես բիզնես, որևէ այլ բիզնես, ըստ էության, չի զարգանալու: Մինչև մարդը չիմանա, որ ինքը կարող է ծառ կտրելու փոխարեն շինարարության վրա աշխատի, ճանապարհաշինության վրա աշխատի, տանը ինչ-որ փոքր բիզնեսով զբաղվի, ծառահատումների կարիքը միշտ լինելու է: Իսկ երբ ապօրինի ծառահատումները որպես բիզնես փակես, ինքը կսկսի արդեն մտածել, թե ինչ է անելու: Այսինքն ծառերի ապօրինի հատումը լուրջ բիզնե՞ս է եղել: Ես լրիվ համամիտ եմ այն թվերի հետ, որոնք բերեց շրջակա միջավայրի նախարարությունը, որ մեկ մլրդ խմ անտառ է հատվել, իսկ դա 40 մլն դոլարի շուկա է: Այսինքն դա խոշոր բիզնես է եղել, դրանք կազմակերպված բանդաներ են, ես այլ բառ չեմ կարող ասել: Ստացվում է, որ փողոց դուրս եկած մարդիկ երևացող մասն են, իսկ իրական տերերն այլ մարդի՞կ են: Իհարկե, դա շատ բազմաշերտ բիզնես էր, որը աստղաբաշխական եկամուտներ էր ապահովում մի շատ փոքր խումբ մարդկանց համար: Եթե դուք հետաքրքրվեք որպես լրագրող, կտեսնեք, որ այնտեղ «Լամբորջինի»-ներով պտտվող երիտասարդներ կային: Ասենք, հայրը որդու համար Պորշ Կայեն էր առնում, որովհետև որդին բանակից վերադառնում էր և ասենք, այդ մարդիկ որևէ բանով չեն զբաղվում, բացի անտառահատումների սխեմաների մեջ լինելուց: Բայց այստեղ պետք է հստակ տարանջատել այն մարդկանց, որոնք ուղղակի անտառի հաշվին տուն են տաքացնում: Տունը տաքացնելու խնդիր որևէ մեկը երբեք չի ունենալու: Անտառը առանց մեծ վնասներ կրելու կարող է ապահովել այդ մարդկանց տանը տաքանալը: Այդ հարցն ընդհանրապես չի քննարկվում: Որևէ մեկը ձեզ չի անհանգստացնի, եթե դուք մի քանի կապ փայտ, չորուկները բերել եք տուն: Պատմության մեջ այդպիսի բան չի եղել, որ ասեն՝ չէ, չբերեք: Խոսքը փայտահատումների և փայտամշակման ենթակառուցվածքներ ստեղծելու մասին է: Իջևանի անտառներից ծառ էին կտրում տախտակ էին քաշում և ռուսական փայտի փաստաթղթերով շրջանառվում էր Հայաստանում: Տարեկան 30-40 մլն դոլարի շրջանառությունը այստեղ մի քիչ համեստ թիվ է:

ՍԻՐԱՆՈՒՅՇ ՊԱՊՅԱՆ, Հարցազրուցավար
23-07-2019 23:24