Աղմուկը մեծ է, դա ավելի շատ տրենդային է դարձել, որովհետև Հայաստանում 400 հանք է գործում

Մեր զրուցակիցն է ԱԺ փոխնախագահ Ալեն Սիմոնյանը Պարոն Սիմոնյան, Ամուլսարի հարցը կարծես թե պառակտում է մտցրել «Իմ քայլը» խմբակցությունում: Նախ՝ պառակտում գոյություն չունի, շատ ենք ուռճացնում հարցը: Կա քննարկում: Մյուս կողմից, Ազգային ժողովը, լինելով նաև քաղաքական հենարան, միաժամանակ ինքը կառավարության այս որոշման հետ կապված որևէ լծակ չունի: Քննարկումները լինում են միշտ բոլոր հնչեղություն ունեցող նախագծերի հետ կապված: Հետևաբար, պառակտում բառը ես կարծում եմ սխալ է: Կա քննարկում և կարծիքների բախում, ինչը նորմալ է ու ճիշտ է: Ինձ ավելի շատ կանհանգստացներ, եթե դա չլիներ: Երբ նախկինում օրինագծեր էին գալիս և որոշ պատգմավորներ դեմ էին, սակայն կողմ էին քվեարկում, նշվում էր, թե մենք քաղաքական մեկ թիմ ենք, չենք շեղվում մեր թիմից: Այս առումով չկա՞  հակասություն ձեր ասածի մեջ: Տարբերությունը միայն այն է, որ մեզ մոտ այդ քննարկումները շատ ավելի բաց են: Ֆեյսբուքում «Իմ քայլը» պատգամավորները հրապարակավ բանավիճում են, միմյանց նախատում: Դա ևս նորմա՞լ եք համարում: Նորմալի չափանիշները պետք է հասկանանք: Երբ փակ դռների հետևում էին ամեն ինչ որոշում, դա մի բան էր, երբ  ազատ քննարկում ենք, դա էլ մի ուրիշ բացասական բան է ընկալվում: Համենայնդեպս, մարդկանց ավելի շատ ուրիշ հարցեր են հետաքրքրում, քան այն, թե ինչպես են «Իմ քայլի» ներսում քննարկում հարցերը՝ բաց, փակ, կոռեկտ, թե ոչ կոռեկտ: Ինչ վերաբերում է միասնականությանը, այո, մեր թիմը միասնական է: Վարչապետը «Էլարդի» եզրակացությունն ուղարկեց շրջակա միջավայրի նախարարություն՝ լրացուցիչ ուսումնասիրության: Սա հանրային ճնշման արդյո՞ւնք էր: Դա նոր իշխանության ոճաբանություն է: Երկու օր առաջ լրագրողներն ինձ հարցնում էին՝ իսկ այդ մարդկանց ասելիքը լսելի չէ՞: Այ սա լսելու արդյունքն է: Մարդկանց պետք է բացատրվի յուրաքանչյուր հարց, որն իրենց հետաքրքրում է: Ինչպե՞ս եք գնահատում ԱԺ դռները ակտիվիստների առաջ փակելու փաստը՝ հաշվի առնելով, որ 2018-ի հոկտեմբերի 2-ին հստակ ուղերձներ կային, որ այլևս բաց է լինելու այգին: Տարածքը հիմա էլ է բաց: Դուք ականատես եք եղել, որ ոչ միայն այդ օրը, այլ նաև այլ օրերի այդտեղ ակտիվիստներ են եղել, և եղել է իրավիճակ, երբ ոստիկանությունը, իրավիճակը գնահատելով, որոշում է կայացրել թույլ չտալ ակտիվիստներին մտնել այգի: Ընդ որում՝ այդ օրը ևս այգին բաց է եղել: Ուղղակի այդ պահին իրավիճակը գնահատելով թույլ չեն տվել մտնել այգի: Ճիշտ կլինի հարցն ուղղել ոստիկանությանը, ես չեմ համարում դրանով արձանագրել, որ ԱԺ դարպասները փակ են եղել: Ի դեպ, ԱԺ-ն արձակուրդում է, և շենքում այդ պահին մարդ էլ չի եղել: Եթե հանքը շահագործվի, կարո՞ղ է դա հանգեցնել հրաժարականների շքերթի, մասնավորապես, պատգամավորները վայր դնեն մանդատը: Ես չեմ կարող ուրիշների փոխարեն խոսել: Համենայնդեպս, ես չեմ կարծում, որ դա ԱԺ օրակարգի հարց է: Միգուցե կառավարությունից որևէ մեկը հրաժարական տա, բայց Ազգային ժողովում, մեծ հաշվով, սրա հետ կապված որևէ գործընթաց տեղի չի ունենում: Ինչո՞ւ պետք է պատգամավորները հրաժարական տան, որովհետև այլ կարծի՞ք ունեն: Եթե մարդիկ նման ծայրահեղ մոտեցում ցուցաբերեն, թող ցուցաբերեն: Ամուլսարի հարցը հանրաքվեի դնելը արդյոք հանրային համերաշխություն չէր հաստատի: Նախ՝ օրենքը թույլ չի տալիս հանրաքվեի դնել նման հարցը: Ես այս պահին նման անհրաժեշտություն չեմ տեսնում: Ես չեմ կարծում, որ խնդիրն այնքան մեծ է: Ես տեսնում եմ, որ աղմուկը մեծ է, տեսնում եմ, որ դա ավելի շատ տրենդային է դարձել, որովհետև Հայաստանում 400 հանք է գործում: Խոսողների մեծ մասը, ես վստահ եմ, չգիտի, թե որտեղ է գտնվում Ամուլսարը: Ես զարմանքով եմ վերաբերվում այն մարդկանց, որոնք խոսում են դրա մասին և թվում՝ դա իրենց համար կյանքի ու մահի հարց է: Այդ մարդիկ լռում էին, երբ Իջևանում մարդիկ դուրս էին եկել փողոց և պահանջում էին թույլ տալ, որ իրենք ծառեր կտրեն: Այսօր Ամուլսարի թեման տրենդային է, ինչպես նաև տրենդային է Ստամբուլի կոնվենցիան: Երբ ունենք երկու տարբեր կարծիքներ և ունենք իրավիճակ, որ պետք է լուծում տրվի, այդ լուծման ժամանակ մենք դիմում ենք մասնագետի: Երբ մենք հայտարարում ենք, որ դիմում ենք մասնագետի, այդ ժամանակ ևս ոչ մեկը ձայն չի հանում: Ես կարծում եմ, որ դա համապետական հարց չէ: Ես համարում եմ, որ սա մարդկանց ամենաշատը հուզող խնդիրը չէ: Մենք նոր սար չենք բացել, բայց մենք ժառանգել ենք Ամուլսարը, և Ամուլսարը, բացի հանքից, ՀՀ՝ որպես գործընկեր չափման միավորն է: Միևնույն ժամանակ ասել ենք, որ եթե լինի խնդիր, անգամ եթե մեկ լիտր ջուր փչանալու է, չի շահագործվի, բայց այն պարագայում, երբ դա չկա, որոշումը պետք է կայացնի կառավարությունը, և ես կպաշտպանեմ յուրաքանչուր որոշում, որը կկայացնի կառավարությունը:

ՍԻՐԱՆՈՒՅՇ ՊԱՊՅԱՆ, Հարցազրուցավար
24-08-2019 16:42