Պետությունը կաջակցի ջերմատնային տնտեսություն կառուցողներին

12-09-2019 09:43

«Հայաստանի Հանրապետություն» օրաթերթը գրում է. «Բանջարանոցային մշակաբույսերի համախառն բերքը 2018թ. կազմել է 628.2 հազ.տոննա, որը ներառում է 926 հա ջերմոցներից եւ ջերմատներից հավաքված 68.2 հազ. տ բանջարանոցային մշակաբույսերի բերքը: Օպերատիվ տվյալների համաձայն՝ Հայաստանում շահագործվում է շուրջ 1300 հա ջերմատուն, որից նորագույն տեխնոլոգիաներով մշակվող ջերմատների մակերեսը շուրջ  177 հա է: Ջերմատների ընդհանուր քանակի շուրջ 90 տոկոսը Արարատի, Արմավիրի եւ Կոտայքի մարզերում են: Ներկայում կառուցվում են 26 հա ընդհանուր տարածքով ջերմատներ: Էկոնոմիկայի նախարարությունը համարում է, որ բանջարեղենի առանձին տեսակներ` լոլիկը, վարունգը, տաքդեղն ու սմբուկը կտրուկ թանկանում են նոյեմբերից: Հիմնականում բարձրանում են ծածկած գրունտի բանջարեղենի գները: Եվ այս ծածկած գրունտի բանջարեղենի գնի վրա մեծ ազդեցություն է ունենում ներքին շուկայում իրացվող ծածկած գրունտի փոքր արտադրողների արտադրանքը, որոնց ինքնարժեքը համեմատաբար բարձր է, եւ պահանջարկի դեպքում էլ գները տարեվերջին զգալիորեն փոխվում են՝ դեպի բարձրացում: Իսկ պետական աջակցության ծրագիրը կմեղմի գնային տատանումները, ապրանքն ավելի մատչելի կդառնա»:

Lragir.am,
12-09-2019 09:43