Քրեական ենթամշակույթը կրողների մեծ ներհոսք կա դեպի Հայաստան

Մեր զրուցակիցն է ԱԺ «Իմ քայլը» խմբակցության պատգամավոր Քրիստինե Պողոսյանը Երեկ Ձեր ելույթում վիճակագրություն ներկայացրեցիք, ըստ որի՝ բանակում միջանձնային հարաբերությունների հետևանքով մենք ավելի շատ զոհ ունենք, քան սահմանային լարվածության արդյունքում, մի դեպքում 158, մյուս դեպքում 150: Ի՞նչ եք կարծում, քրեական ենթամշակույթի վերացմանն ուղղված այս օրինագիծը, երբ օրենքի ուժ ստանա, որքանով կլուծի այդ խնդիրը: Թե՞ խնդիրն ավելի խորքային է, և պետք է սկսել դպրոցից, մանկապարտեզից: Ես միանշանակ ասացի, որ սա ապագայի օրենք է: Սա կանխարգելիչ օրենք պետք է լինի: Մենք այս օրենքն առաջ ենք մղում հենց դրա համար: Երկու կետ կար, որոնցից մեկին չանդրադարձա: Մեր հարևան երկրները՝ Ռուսաստանը և Վրաստանը, արդեն ընդունել են այսպիսի օրենք, և արդեն ոստիկանության հետ զրույցների արդյունքում պարզել եմ, որ այդ ենթամշակույթը կրողների մեծ ներհոսք կա դեպի Հայաստան: Այս օրենքը լուծում է այդ հարցը, որ կանխարգելի այդ մարդկանց հոսքը, որպեսզի Հայաստանը չդառնա իրենց համար պահվելու տեղ: Թող գնան որևէ այլ երկիր, որտեղ իրենց ավելի ազատ կզգան, չգան Հայաստան: Երկրորդ, ոչ ոքի համար գաղտնիք չէ, որ այդ ենթամշակույթը շատ խորը արմատներ է գցել բանակում: Գիտեմ, որ այս մասին ընդունված չէ բարձրաձայնել, նուրբ թեմա է, բայց երևի այս օրենքի դեմ խոսող մարդկանց համար պետք է այս նուրբ թեման բարձրացնենք, որ հասկանան: Միջանձնային լուրջ հարաբերություններ են լինում, որոնց ճնշող մեծամասնության դեպքում հիմքում հենց դա է ընկած: Ես միանշանակ չեմ ասում, որ բոլոր դեպքերը կապված են հենց դրա հետ, դա այդպես չէ, բայց ես դուրս բերեցի վիճակագրական թվերը, որպեսզի պարզ դառնա, թե ինչ լուրջ հարց է դա: Նույնիսկ եթե հավասար լինեին թվերը, նույնիսկ սահմանային լարվածության հետևանքով զոհերի կեսի չափով լիներ թիվը, քրեական ենթամշակույթի հետ կապված նույնիսկ մեկ զինվորի զոհը ես համարում եմ ողբերգություն, և դրա դեմ պետք է պայքարենք: Իհարկե, մեկ օրում չի լինելու, մեկ տարում չի լինելու: Բայց սա զսպաշապիկ պետք է լինի, սա կանխարգելող պետք է լինի: Կամաց-կամաց իրավիճակը կշտկենք: Հարցն այն է, որ նրանցից շատերը օրենքից դուրս են գործում, իրենք ունեն իրենց օրենքները: Այս դեպքում ինչպե՞ս է հնարավոր նրանց օրենքի դաշտ բերել: Ես հենց այդ մասին խոսեցի: Պատժելի է լինելու հանցավոր քրեական միավորներին աջակցելն ու դրանում լինելը: Այսինքն այդ մարդկանց նման խմբակում լինելու արդյունքում արված քրեական հանցագործությունները պատժվելու են: Այսինքն՝ դուք նման օրենքի անհրաժեշտությանը հանգել եք նաև կառավարության հետ քննարկումների արդյունքո՞ւմ: Ամիսներ շարունակ արդեն գնում է այս աշխատանքը: Մենք ոչ հրապարակային աշխատել ենք արդարադատության նախարարության հետ, մենք էլ մեր առաջարկներն ենք արել: Ասեմ, որ մեր առաջարկներն ավելի խիստ էին, մեղմացվել է: Նախարարությունը հաշվի է առել մարդու իրավունքները, որպեսզի հակասություն չլինի այլ օրենքների հետ: Լրամշակված տարբերակով է նախագիծը եկել: Այո, մեր հանձնաժողովը լուրջ մտահոգություն ունի, որը մենք հայտնել ենք: Մեզ համար կարևոր է զինվորի կյանքը, կարևոր է մեծացող դեռահաս երեխաների ձևավորվող աշխարհայացքը, որտեղ տեղ չպետք է ունենան այս արժեքները: Վերջերս, եթե հիշում եք, Սյունիքի մարզում զորամասում դեպք էր տեղի ունեցել, երբ պարզվեց, որ այնտեղ մարդ կա, որը ոչ միայն քրեական ենթամշակույթը կրում ու տարածում է, պարզվեց, որ շատ ավելի վատ բաներ է արել բանակի ներսում գտնվելով: Այդ ամենը հիմք է հանդիսացել, որ մենք էլ մեր նկատառումներն անենք: Այս օրենքը չի խնայելու ոչ մեկի՞ն, այդ թվում սպայական կազմի՞ն, որոնք իրենց մեջ կկրեն քրեական ենթամշակույթը: Հանուն արդարության պետք է ասեմ, որ սպայական կազմը շատ քիչ է ներգրավված այս ամենի մեջ: Ավելի շատ երիտասարդներն են ներսում իրենք իրենց մեջ օրենքներ ձևավորում, իսկ դրա մասին մենք արդեն ասացինք, որ պետության մեջ պետություն չպետք է լինի:

ՍԻՐԱՆՈՒՅՇ ՊԱՊՅԱՆ, Հարցազրուցավար
20-11-2019 11:31