Ժողովրդի աջակցությունը ստացած քաղաքական ուժն ավելի ու ավելի է մսխում հեղափոխությունը

Մեր զրուցակիցն է «Քաղաքացու որոշում» սոցիալ-դեմոկրատական կուսակցության անդամ Գարեգին Միսկարյանը Պարոն Միսկարյան, Ձեր վերջին գրառումները, հարցազրույցները ցույց են տալիս, որ ձեր հայացքները բավական արմատական են դարձել: Դա ինչո՞վ է պայմանավորված: Եթե արմատական ասելով նկատի ունեք «կտրուկ», ապա այո, կա այդպիսի բան: Հիմնական պատճառն այն է, որ թավշյա հեղափոխություն հռչակած և հեղափոխության օրակարգը կյանքի կոչելու համար ժողովրդի աջակցությունը ստացած քաղաքական ուժը ամեն օր ավելի ու ավելի է մսխում այդ հեղափոխությունը: Վերջին իրադարձությունները՝ կապված վեթինգը չեղարկելու հետ, ինձ պարզապես հունից հանեցին: Որպես քաղաքացի՝ ինձ համար դրա թե բովանդակությունն էր անչափ տհաճ, և թե մատուցման ձևը, որն ընտրել էին վարչապետն ու Արդարադատության նախարարը: Բովանդակության առումով տհաճ էր այն, որ Նիկոլ Փաշինյանը և Բադասյանը իրենց «երկխոսության» միջոցով հանրությանը տեղեկացրին, որ բառացիորեն մեկ տարի առաջ վեթինգի վերաբերյալ տված խոստումներից ոչ մեկը չի իրականանալու: Այսինքն՝ դատավորները նախկինում կատարած իրենց հանցանքների համար պատասխան չեն տալու: Ավելին, ասացին, որ դատավորների զտում չի լինելու առհասարակ, և բոլոր դատավորները մնալու են իրենց տեղում: Այսինքն, հեղափոխական ամբիոնից հայտարարված համակարգային փոփոխությունների կարևորագույն մաս կազմող դատական համակարգը ոչ մի փոփոխության չի ենթարկվելու ու այն «բարեփոխվելու» է էվոլուցիոն ճանապարհով: Այն է, որ եթե ինչ որ մի դատավոր թոշակի գնա, ապա նրան փոխարինող նոր դատավորը բարեվարքության որոշակի չափանիշների պիտի համապատասխանի: Այնինչ մի տարի առաջ, երբ այդ նույն դատարանների կողմից վտանգ կար, որ Ռոբերտ Քոչարյանի խափանման միջոցը կարող են փոխել, նույն Նիկոլ Փաշինյանը կոչ էր անում շրջափակել դատարանները և մեզ խոստանում էր վեթինգի ենթարկել դատավորներին: Այսօր հետահայաց, երբ նայում եմ, տեսնում եմ, որ դա ոչ թե ժողովրդին տրված խոստում էր, այլ դատավորների հասցեին հնչեցրած սպառնալիք: Հենց դա էլ ինձ հանում է հունից: Բադասյանի և Փաշինյանի հարցազրույցի ձևի մասին թերևս երկար իմաստ չունի խոսել, որովհետև ակնհայտ էր, որ ոտքից գլուխ բեմադրած շոու էր, հանրությանը համոզելու համար, որ վեթինգը անհնար է իրականացնել: Ձեր կարծիքը համընկնո՞ւմ է ՔՈ–ի թիմի կարծիքի հետ: Կարո՞ղ ենք ասել, որ ՔՈ–ն նույնպես իրեն դիրքավորում է որպես արմատական ընդդիմություն: «Քաղաքացու որոշում» կուսակցության բազմաթիվ անդամներ սոցիալական ցանցերի իրենց էջերում հայտնել են իրենց դիրքորոշումը, և ես պիտի ասեմ, որ այն շատ չի տարբերվում իմից: Գուցե մեր ընկերներից ոմանց մոտ ավելի կոշտ են եղել գնահատականները, քան ինձ մոտ, մյուսների մոտ ավելի մեղմ, բայց այն, որ հեղափոխական օրակարգից շեղումը մեզանից շատերին դուր չի եկել, դա ակնհայտ է: Այդուհանդերձ, ասել, թե իմ և իմ ընկերների դիրքորոշումը դա կուսակցության դիրքորոշումն է, չի կարելի, որովհետև կուսակցության դիրքորոշման համար հարկավոր է կուսակցության ներսում քննարկումներ կազմակերպել, դրանից հետո կուսակցության կանոնադրության համաձայն կուսակցության պաշտոնական դիրքորոշում կարող են հայտնել միայն կուսակցության Գործադիր մարմնի քարտուղարը և կուսակցության մամուլի խոսնակը: Բայց, ինչպես հասկանում եք, համաճարակով պայմանավորված բազմամարդ հավաքներից դեռևս խուսափում ենք: Ինչպե՞ս եք գնահատում ՍԴ–ի խնդրի լուծման իշխանությունների որդեգրած մոտեցումը, որոնք մտադիր են խնդիրը լուծել ոչ թե հանրաքվեով, այլ ԱԺ–ի միջոցով: Սա ՍԴ ճգնաժամը հաղթահարելու, կարծեմ, չորրորդ փորձն է: Ես չէի ուզի այն մեկնաբանել, որովհետև բնավ հակված չեմ կարծելու, որ սա տակավին վերջին փորձն է ու վերջին տարբերակն է, և մեկ ամիս հետո ԱԺ-ն, կամ ԻՔ-ն, կամ Նիկոլ Փաշինյանը չի հայտնելու նոր «լուծում», նոր «ճանապարհ», նոր «ուղի»: Այնպես որ, ես կգերադասեի սպասել և տեսնել, թե ինչ քայլեր են հետևելու այդ հայտարարությանը: Դուք ձեր գրառումներում նշում եք, որ Նիկոլ Փաշինյանը խաբել է հասարակությանը, չի կատարել տված խոստումները: Արթուր Վանեցյանը նույնպես խոսում է համախմբման անհրաժեշտությունից: Ընդհանրապես, հնարավոր համարո՞ւմ եք նրանց հետ համագործակցությունը: Ես իմ հարցազրույցներում մեկնաբանել եմ, որ խոսքը հեղափոխական օրակարգից շեղվելուն է վերաբերում և հարթակից հնչեցված խոստումները չկատարելուն: Շեշտում եմ՝ խոսքը հեղափոխական օրակարգի մասին է, որի իրականացման դեպքում Վանեցյանն ու իր նմանները պիտի այսօր ոչ թե «ընդդիմադիր-ընդդիմադիր» խաղային, այլ առնվազն նստած լինեին մեղադրյալի աթոռին: Ինչպե՞ս ես կարող եմ համագործակցել մեկի հետ, որի սպասարկած համակարգի դեմ դուրս եմ եկել հեղափոխության: Իմ կռիվը չի եղել անձերի դեմ, իմ կռիվը եղել է համակարգի դեմ, իմ կռիվը եղել է հանուն արժեքների, և չեմ կարծում, որ ես ու կոռուպցիոն գործարքների մեջ կասկածվողը, պալատական հեղաշրջում նախապատրաստելու մեջ կասկածվողը կարող ենք արժեքային ընդհանրություն ունենալ:

ՍԻՐԱՆՈՒՅՇ ՊԱՊՅԱՆ, Հարցազրուցավար
23-05-2020 20:34