Արցախի ՄԻՊ-ը փակ զեկույց է կազմել Ադրբեջանում հայ գերիների նկատմամբ անմարդկային վերաբերմունքի վերաբերյալ

17-10-2020 21:07

Արցախի Մարդու իրավունքների պաշտպան Արտակ Բեգլարյանը հոկտեմբերի 17-ին հրավիրված մամուլի ասուլիսի ընթացքում հայտնել է, որ փակ զեկույց է կազմել Ադրբեջանում հայ գերիների և զոհված հայ զինծառայողներին մարմինների հանդեպ անմարդկային վերաբերմունքի վերաբերյալ: «Վերջին օրերին սոցիալական ցանցերի ադրբեջանական տիրույթում տեսանյութեր են տարածվում հայ զինծառայողների դիակների ու հայ գերիների հանդեպ անմարդկային վերաբերմունքի վերաբերյալ: Տեսանյութի մասով համապատասխան փորձագիտական աշխատանք ենք կատարել: Փակ զեկույց է կազմվել, որն արդեն ուղարկվել է միջազգային հարթակներ»,- ասաց Բեգլարյանը: Արցախի Մարդու իրավունքների պաշտպանը նշեց, որ միջազգային հանրությունը պետք է գործնական քայլեր ձեռնարկի` հետագայում նման անմարդկային դեպքերը կանխարգելելու ուղղությամբ: «Ադրբեջանի ԶՈՒ-ում հայատյացության ընդգծված մթնոլորտ է, դրան լրացվում է նաև ահաբեկիչների ու թուրքական ԶՈՒ ներգրավումը ռազմական գործողությունների մեջ, ինչը նշանակում է, որ ռիսկերը մեծանում են, որ նման դեպքերը կարող են կրկնվել: Սա խստագույնս պետք է դատապարտվի միջազգային հանրության կողմից»,- նշեց Արցախի ՄԻՊ-ը: Սոցիալական ցանցերում տեսանյութեր են տարածվում, որտեղ երևում է, թե ադրբեջանական կողմն ինչպիսի անմարդկային վերաբերմունք է ցույց տալիս հայ գերիների նկատմամբ: Տեսանյութերից մեկում Հայաստանի դրոշներով փաթաթված գերիներից երկուսին գնդակահարում են: Հայաստանի և Արցախի գլխավոր դատախազություններում այդ դեպքի առնչությամբ քրեական գործեր են հարուցվել:

Lragir.am,
17-10-2020 21:07