Ինչ են խոսել նախկին նախագահները

ՀԱԿ մամուլի խոսնակ Արման Մուսինյանը հայտնել է Հայաստանի երեք նախկին նախագահների՝ Տեր-Պետրոսյանի, Քոչարյանի եւ Սարգսյանի հանդիպման մասին: Հանդիպմանը մասնակցել են նաեւ Արցախի նախկին երկու նախագահներ Սահակյանն ու Ղուկասյանը: Տարիներ շարունակ տարբեր ձեւաչափերով միմյանց հետ բաց եւ քողարկված կոշտ դիմակայության մեջ գտնված նախագահները հանդիպում են Արցախի շուրջ ստեղծված իրավիճակը քննարկելու համար: Մինչ այդ տեղի էր ունեցել Արցախի երկու նախկին նախագահների հանդիպումը Հայաստանի վարչապետ Նիկոլ Փաշինյանը հետ: Հետո նրանք առանձին հանդիպումներ էին ունեցել Ռոբերտ Քոչարյանի հետ եւ Սերժ Սարգսյանի, ու՝ Լեւոն Տեր-Պետրոսյանի հետ: Որքանով է ձեւաչափի բացառիկությունը տարածվում բովանդակության վրա, դժվար է ասել, այդ առնչությամբ տեղեկություն չկա: Գոնե մինչ այդ եղած միակ տեղեկություն հնարավոր է համարել Ռոբերտ Քոչարյանի գրասենյակի ղեկավար Սողոմոնյանի եւ ՀՀԿ ներկայացուցիչ Շարմազանովի հերքումները՝ կապված մամուլում եղած որոշ հրապարակումների հետ: Մասնավորապես, որոշ տեղերում գրվել էր, թե՝ «ՀՀ նախկին նախագահները որոշել են աջակցել Նիկոլ Փաշինյանի գործողություններին և մասնավորապես՝ զինադադարի կնքման որոշմանը, որն իրենց նախկին հայտարարություններից ու դիրքորոշումներից այնքան էլ չի բխում»: Լրատվամիջոցներից մեկը նաև գրել էր, թե իր տեղեկություններով՝ Արցախի և Հայաստանի նախկին նախագահները շուտով հանդես են գալու համատեղ հայտարարությամբ, որտեղ շարադրելու են իրենց համատեղ դիրքորոշումը: ՀՀԿ խոսնակը հայտնել է, որ այդ լուրերը չեն համապատասխանում հանդիպման բովանդակությանը: Ռոբերտ Քոչարյանի գրասենյակի ղեկավարը նշել է, որ այդօրինակ տեղեկությունները կեղծիք են եւ հորինվածք: Ի՞նչ են քննարկել երեք նախագահները: Անկասած է, որ ինչպես բացառիկ է ձեւաչափը, այդպես էլ պետք է բացառիկ լինի բովանդակությունն ու արդյունքը՝ բնականաբար պետության, հայկական դիմադրունակության համար: Միաժամանակ բավականին ուշագրավ են մամուլում «բովանդակության» մասին տեղեկություններն ու դրանք հերքումը: Փաստացի ստացվում է, որ նախագահները չեն քննարկել զինադադարի կնքմանն աջակցելու հարց: Ըստ այդմ, իր հերթին առաջանում է հարց՝ արդյո՞ք հնարավոր է ենթադրել, որ նրանք քննարկել են բանակին աջակցության հարցեր, կամ այլ կերպ ասած՝ խաղաղություն պարտադրելու գործընթացին աջակցության հարց: Դա կարող է լինել էական հանգամանք, հաշվի առնելով, որ զինադադարի պայմանները կռում է բանակը: Իր հերթին բանակին ամեն ինչով աջակցելու նոր կոչ է արել վարչապետ Փաշինյանը, խոսելով այն մասին, որ այս փուլում փաստացի չկա դիվանագիտական հանգուցալուծում, այսինքն չկա զինադադարի՝ հայկական կողմի համար ընդունելի տարբերակ: Այդ իմաստով նշմարելի՞ է, որ վարչապետն ու նախկին նախագահները խոսում են նույն լեզվով: Եվ արդյո՞ք նրանք կխոսեն նաեւ միասին:

ՀԱԿՈԲ ԲԱԴԱԼՅԱՆ, Մեկնաբան
22-10-2020 08:34