«Մեր բակը» մանկապարտեզը ոչ հաստատում, ոչ էլ հերքում է երեխաներին ծեծելու մասին լուրերը

04-12-2020 18:00

«Մեր բակը» մասնավոր մանկապարտեզը ոչ հաստատում և ոչ էլ հերքում է երեխաների նկատմամբ բռնություն կիրառելու վերաբերյալ համացանցում տարածված ձայնագրության իսկությունը: «Արմենպրես»-ի հետ զրույցում մանկապարտեզի «Բաղրամյան» մասնաճյուղի տնօրեն Անի Հայրապետյանն ասաց, որ ձայնագրությունը հրապարակել է ծնողներից մեկը, ով իր երեխային 2 օր է ինչ տանում է այդ մանկապարտեզ: «Հարցեր կան, որոնք դեռ չենք պարզել: Պետք է հասկանանք, թե ինչ ձայնագրություններ են: Ծնողներից մեկը հրապարակել է այդ ձայնագրությունը, սակայն մենք արդեն դիմել ենք բոլոր օրինական հարթակներ: Օրենքի սահմաններում կպարզվի՝ արդյոք այդ ձայնագրությունն արվել է մեր մանկապարտեզում, ըստ այդմ մենք հանդես կգանք մեկնաբանությամբ»,- նշեց Հայրապետյանը և հավելեց, որ, երբ իրավապահները կավարտեն իրենց գործը, կտան վերջնական եզրակացություն դեպքի առնչությամբ, այդ ժամանակ էլ համապատասխան հայտարարությամբ հանդես կգան: ՀՀ ոստիկանության հասարակայնության հետ կապերի և լրատվության վարչությունից էլ «Արմենպրես»-ին տեղեկացրին, որ ծնողները ներկայում հաղորդում են ներկայացնում հանցագործության մասին: «Հետագա գործողությունների վերաբերյալ լրացուցիչ կտեղեկացնենք»,- նշեցին ոստիկանությունից:

Lragir.am,
04-12-2020 18:00