Նորարարության կենտրոններ, բիզնես ինկուբատորներ. ԿԳՄՍՆ-ն մանրամասնում է ակադեմիական քաղաքի ծրագիրը

08-08-2022 11:16

Կառավարության կողմից հաստատված «Կրթության՝ մինչև 2030 թվականը զարգացման պետական ծրագիր»-ը նախատեսում է էական բարեփոխումներ բարձրագույն կրթության ոլորտում:  Այդ ուղղությամբ աշխատանքների առանցքում ակադեմիական քաղաքի ստեղծումն է: «Արմենպրես»-ի հաղորդմամբ՝ ՀՀ կրթության, գիտության, մշակույթի և սպորտի նախարարության բարձրագույն և հետբուհական մասնագիտական կրթության վարչության պետ Լուսինե Գրիգորյանը, մանրամասնելով ակադեմիական քաղաքի ստեղծման ծրագիրը, նշեց, որ ներկայում քննարկումներ են ընթանում ամենատարբեր ուղղություններով՝ տարածք, ենթակառուցվածքներ, բուհերի միավորում,  առանձին ֆակուլտետների հիմնում և այլն: «Այս պահին քննարկվում են քաղաքի տարածքի հարցերը, դրան զուգահեռ՝ ֆինանսավորման չափերը: Ակադեմիական քաղաքն իրենց ենթադրում է մի տարածք, որտեղ պետք է գործեն բուհեր, գիտահետազոտական կազմակերպություններ, ինչը հնարավորություն կտա ուսանողներին այնտեղ ապրելու, սովորելու, ստեղծագործելու, հետազոտելու: Դրա համար պետք է համապատասխան ենթակառուցվածքներ լինեն՝ հանրակացարաններ, գրադարաններ, ժամանակակից չափանիշներով հարուստ լաբորատորիաներ, բազմաֆունկցիոնալ լսարաններ, նորարարության և ձեռներեցության կենտրոններ, բիզնես ինկուբատորներ և այլն»,-ասաց Լուսինե Գրիգորյանը: Արդյո՞ք տեղում կստեղծվեն նոր բուհեր, թե եղած բուհերը միավորման արդյունքում կտեղափոխվեն այդ քաղաք: Հարցին ի պատասխան, նախարարության ներկայացուցիչը նշեց, որ այժմ քննարկվում են բոլոր հնարավոր տարբերակները: Դրանք վերաբերում են ինչպես բուհերի խոշորացմանը, նրանց մասնաճյուղերի հիմնադրմանը, տվյալ տարածքում առանձին ֆակուլտետների ստեղծմանը, այնպես էլ նոր որևէ բուհ ստեղծելուն: Այդ բոլոր հարցերը դեռ քննարկվում են պետական կառավարման շահագրգիռ կողմերի հետ: Քաղաքի տարածքը դիտարկվում է Երևանից դուրս: Այժմ մի քանի տարածքներ պատկան մարմինների ուշադրության կենտրոնում են: «Այս ընթացքում ուսումնասիրություններ ու վերլուծություններ են կատարվում՝ վերհանելու ոլորտային ուղղությունները, գնահատելու բուհերի, գիտական կազմակերպությունների ներուժը: Քննարկվում են բնագիտամաթեմատիկական, ինչպես նաև ինժեներական, կրթության առաջատար ուղղությունները: Հիմքում լինելու է այն, որ սերտ համագործակցություն ձևավորվի բուհերի ու գիտական կազմակերպությունների միջև, բարձրացվեն գիտական ներուժի հետազոտական կարողություններն ու հմտությունները, նորարարական գաղափարների օգտագործման արդյունավետությունը»,-ասաց Լուսինե Գրիգորյանը: Նախարարության ներկայացուցիչն ընդգծեց, որ նպատակ է դրված ունենալ որակյալ, մրցունակ կրթություն նաև միջազգային տեսանկյունից: Խնդիր է դրված ստեղծել միջազգայնորեն ճանաչված գիտահետազոտական համալսարան, որն էական դերակատարություն կունենա երկրի տնտեսական զարգացման և տեխնոլոգիական, ինչպես ազգային, այնպես էլ տարածաշրջանային ծրագրերում: «Նպատակ է դրված նպաստել Հայաստանի տնտեսական մրցունակության, անվտանգության, և պաշտպանունակության բարձրացմանն ու ամրապնդմանը՝ բարձրորակ ինժեներական ներուժի ձևավորման և ինովացիոն գաղափարների ու առաջադեմ տեխնոլոգիաների ստեղծման միջոցով: Նախատեսվում է ստեղծել և իրականացնել երկրի տնտեսության կարիքներին և հասարակության կրթական ու բիոտեխնոլոգիական պահանջմունքներին հնարավորինս համահունչ կրթական ու գիտական ծրագրեր և մատուցել դրանց առնչվող ծառայություններ»,-ասաց Լուսինե Գրիգորյանը:

Lragir.am,
08-08-2022 11:16