ՄԱԿ զեկույց․ Ռուս զինվորականները խաղաղ բնակիչների զանգվածային սպանություններ են իրականացրել

08-12-2022 08:53

ՄԱԿ-ը հրապարակել է Ուկրաինայում ռուս զինվորականների կողմից խաղաղ բնակչության զանգվածային սպանությունների մասին զեկույցը: Ուկրաինայում ՄԱԿ-ի մարդու իրավունքների դիտորդական առաքելության ղեկավար Մաթիլդա Բոգները հայտարարել է, որ 2022 թվականի փետրվարի 24-ին Ռուսաստանի լայնամասշտաբ ներխուժումից հետո ռուս զինվորականները մահապատժի են ենթարկել ուկրաինացի հարյուրավոր խաղաղ բնակիչների: Ինչպես նշվում է Մարդու իրավունքների գերագույն հանձնակատարի գրասենյակի հաղորդագրության մեջ, դիտորդական առաքելության զեկույցը մանրամասնում է, թե ինչպես են ռուսական զորքերը փետրվարի 24-ից ապրիլի 6-ը սպանել խաղաղ բնակիչներին Ուկրաինայի Կիևի, Չեռնիգովի և Սումի շրջանների բնակավայրերում: Այսպես, Կիևի մերձակայքում գտնվող Բուչա քաղաքում, որը մարտի 5-ից 30-ը գտնվել է ռուսական զորքերի վերահսկողության տակ, առաքելությունը փաստագրել է 73 խաղաղ բնակիչների սպանությունը: Նշվում է, որ սպանվածների թվում եղել է 54 տղամարդ, 16 կին, 2 տղա և 1 աղջիկ: Եվս 105 ենթադրյալ սպանություն հաստատման փուլում է: Զեկույցում նշվում է, որ ՄԱԿ-ն այժմ փաստագրել է 441 խաղաղ բնակիչների (341 տղամարդ, 72 կին, 20 տղա և 8 աղջիկ) բռնի մահը երեք շրջաններում միայն ռուսական ներխուժման առաջին 6 շաբաթների ընթացքում: Կազմակերպությունը նախազգուշացրել է, որ իրական թվերը, ամենայն հավանականությամբ, շատ ավելի մեծ կլինեն, քանի որ քննվում են ևս 198 սպանությունները, որոնք տեղի են ունեցել Ուկրաինայի Կիևի, Չեռնիգովի և Սումիի շրջաններում՝ ռուսական զորքերի կողմից օկուպացիայի ժամանակ: Բացի այդ, հաղորդվում է շրջանների օկուպացիայի ժամանակ ուկրաինացիներին անօրինական պահման վայրերում մահապատժի ենթարկելու մասին: Քաղաքացիները ռուսների թիրախում են եղել ճանապարհներին՝ բնակավայրերի ներսում կամ դրանց միջև շարժվելիս, այդ թվում՝ մարտական ​​գործողությունների գոտուց դուրս գալու փորձի ժամանակ: «Ռուս զինվորները խաղաղ բնակիչներին տարել են ժամանակավոր գերության վայրեր, այնուհետև գերության մեջ մահապատժի են ենթարկել: Զոհերից շատերի մարմինները գտել են կապած ձեռքերով և գլխի հրազենային վնասվածքներով», ավելացրել է Բոգները: Միաժամանակ ՄԱԿ-ի զեկույցում ընդգծվում է, որ օկուպանտների կողմից մահապատժի ենթարկված բոլոր զոհերի 88%-ը տղամարդիկ և տղաներ են:

Lragir.am,
08-12-2022 08:53